முன்னுரை:
வேளாண்மைக் குடும்பத்தில் பிறந்து கவித்திறனால் சுமார் இருநூற்று ஐம்பதுக்கும் மேற்பட்ட திரைப்படங்களுக்கு நாலாயிரத்துக்கும் அதிகமானப் பாடல்கள் இயற்றிவர். ”திரைக்கவி திலகம்” என்ற அழியாப் புகழ்பெற்ற அ.மருதகாசி அவர்களின் வாழ்வியல் மற்றும் படைப்பியல் குறித்த ஒரு பொதுப் பார்வை.
பிறப்பு:
இந்தியாவின் தென்கோடியில் கொள்ளிடம் ஆற்றங்கரையில் அமைந்திருந்த ,அன்றையத் திருச்சிராப்பள்ளி மாவட்டம் அரியலூர் வட்டாரமாகும். அங்கே சிமெண்டு ஆலைகளினால் புழுதி மண்டாமலும், பெரும் நிலப்பரப்பை தனியார் தின்னாமலும், பசுமை நிறைந்து வேளாண்குடி நிம்மதியாய்ப் பெருவாழ்வு வாழ்ந்த காலம். அந்நிலப்பரப்பில் மேலக்குடிக்காடு என்னும் சிற்றூரில் ஐய்யம்பெருமாள் மிளகாயி இவர்களுக்கு 1920ஆம் ஆண்டு பிப்ரவரி 13ஆம் நாள் பிறந்தார் மருதகாசி. மருதகாசிக்கு முன்பே இருவர் பிறந்து இறந்துவிட்டதால், மூக்குக் குத்தினால் பிள்ளை உயிர் தங்கும் என்ற அன்றைய நம்பிக்கைக்கு ஏற்ப மருதகாசிக்கு மூக்குத்தி அணிவிக்கப்பட்டது.
கற்றல்:
உள்ளூரில் நான்காம் வகுப்புவரை பயின்றவர் பின்னர் எட்டாம் வகுப்புவரை கும்பகோணம் பாணாதுரை உயர்நிலைப்பள்ளியில் கற்றார். ”பாபநாசம்சிவன்” அவர்களின் அண்ணன் ராசகோபால ஐயரிடம் இலக்கண இலக்கியங்களை கற்றுத் தேர்ந்தார். தனது “இண்டர்மீடியட்” படிப்பை கும்பகோணம் அரசினர்க் கல்லூரியில் நிறைவு செய்தார். மருதகாசி அவர்களின் தமிழார்வம் கண்டு, தமிழறிஞர் கோ.முத்துப்பிள்ளை பலவகையிலும் ஊக்குவித்து வழிகாட்டினார். அப்பருவத்திலேயே அருணாசலக் கவிராயர் படைப்புகளால் ஈர்க்கப்பட்டு, கவிராயரின் படைப்புகளை தேறப் படித்து உள்வாங்கிக்கொண்டார். அப்போதிலிருந்தே தானும் கவியெழுதத் தொடங்கி அப்பயிற்சியில் ஆற்றல் பெற்றவராய் விளங்கினார்.
குடும்பச்சூழலும் இல்வாழ்வும்
மருதகாசி “இண்டர்மீடியட்” படிப்புக்குப்பின் மேற்கல்வி கற்க முற்பட்டபோது, பெருநிலக்கிழாராக இருந்த அவர்தம் அன்றைய குடும்பச்சூழல் அதற்கு ஏதுவாக அமையாமல், வேளாண்மை பக்கம் திருப்பிவிட்டது. அத்துடன் மேற்கல்வி எண்ணத்தை மூட்டை கட்டியவர், வேளாண்மைத் தொழிலில் ஈடுபட்டார். மேலும் தன் தந்தை பார்த்துவந்த கிராம அதிகாரிப் பணியை மருதகாசி தொடர்ந்தார். தமது இருபதாவது வயதில் தனக்கோடி என்பவரைத் திருமணம் செய்துகொண்டு இல்வாழ்வில் இணைந்தார். இவருக்கு மொத்தம் ஒன்பது குழந்தைகள். அதில் ஆறு மகன்கள் மற்றும் மூன்று மகள்கள்.
கதை-வசனம்-பாடல்-நடிப்பு
கவிஞர் கல்லூரிக் காலங்களிலேயே நாடகங்களை எழுதி இயக்கிய பட்டறிவைப் பெற்றார். மேலும் நண்பர்களின் நாடகங்களுக்கும் கதை வசனம் பாடல்கள் எழுதினார். “கலைமகள் உறைந்துடும் கலாசாலை” என்பதுதான் கவிஞர் நாடகத்திற்கு எழுதிய முதல் பாடல் ஆகும். பின்னர் ”தேவி நாடக சபை”யில் பாடலாசிரியராகப் பணியாற்றினார். அதன் மூலம் சூறாவளி என்ற நாடகத்திற்குப் பாடலெழுதும் வாய்ப்பையும் கவிஞர் ”கா.மு.செரீப்” அவர்களின் நட்பையும் பெற்றார். “கா.மு.செரீப்” அவர்களுடன் இணைந்தும் தனியாகவும் நாடகங்களுக்கு பாடல்களை எழுதியிருக்கின்றார். அந்நாடகங்கள் ஒன்றிரண்டில் நடிகராகவும் மேடையேறி நடித்த பெருமையும் நம் கவிஞருக்கு உண்டு.
குருவானவர்கள்
கல்வி கற்கும் காலங்களில் அருணாசலக் கவிராயரின் படைப்புகளால் ஈர்க்கப்பட்டு அவரைத் தனது குருவாகக் கொண்டு படைப்பிலக்கியத்தில் நுழைந்தார். நாடகப் பாடல்கள் எழுதும் காலத்தில் கவிஞர் கா.மு.செரீப் நட்பினை குருவாக மனதில் கொண்டார். திரை இசைப்பாடல்களால் பெரும் புகழ் பெற்ற “உடுமலை நாராயணக்கவி” அவர்களைதான் மருதகாசியின் மானசீக குருவாக கொண்டார். உடுமலை நாராயணக்கவியின் பாடல்களோடு ஒப்பிடுகையில், தனது பாடல்கள் அவரின் தரத்திற்கு நிகரானவை அல்ல என்பதைச் சொல்லியே தனது குருவான உடுமலை நாராயணக்கவியை உச்ச குருவாக நிலை நிறுத்தியவர்.
வசந்த அழைப்பு
”ஒரே முத்தம்”, “பராசக்தி” ஆகிய நாடகங்களுக்குப் பாடல் எழுதிவிட்டு நாடகத்தில் நடிகனாகவும் பயணம் செய்தார். நாடக நிறுவனம் எங்கு செல்கிறதோ அங்கெல்லாம் பயணித்தார். அப்படி காரைக்குடி முகாமில் அரு.ராமனாதன் அவர்களின் “வானவில்” நாடகத்திற்கு திருச்சி லோகநாதன் அவர்களின் மெட்டுக்கு பாடல் எழுதிய கையோடு, குழு தஞ்சையில் முகாமிட்டது. அப்போதுதான் “சேலம் மாடர்ன் தியேட்டர்சின்” கடிதங்கள் கவிஞர் அ.மருதகாசிக்கும் கவிஞர் கா.மு செரீப்க்கும் வந்து சேர்ந்தன. அதுதான் திரைத்துறைக்கான வசந்த அழைப்பு.
திரைத்துறை நுழைவு
சேலம் மாடர்ன் தியேட்டர்சின் கடிதம் சொன்ன தகவல், “நீங்கள் எழுதிய பாடலை திருச்சி லோகநாதன் பாடக் கேட்டோம். பாடல்கள் நிறைவைத் தந்தன, உடனே வந்து சேருங்கள்”. கவிஞர்கள் இருவரையும் மாடர்ன் தயாரிப்பு நிர்வாகம் வரவேற்று இசைமேதை G.இராமனாதய்யரின் மெட்டுக்குப் பாட்டெழுத வாய்ப்பளித்தது. இராமனாதய்யர் மெட்டுக்கு பாட்டெழுதினார் மருதகாசி. பாட்டுவரிகளால் மனநிறைவை பெறச்செய்தார் மருதகாசி. T.R.மகாலிங்கமும் அஞ்சலிதேவியும் நடித்த “மாயாவதி” திரைப்படத்தில் “பெண் எனும் மாயப்பேயாம் பொய்மாதரை” என்று தொடங்கும் வரிகள் பாடலானது. இப்படியாக 1949-ல் திரைத்துறை நுழைவும் இனிதாய் நிகழ்ந்தது. ஒரே நிறுவனத்தில் இருந்து வந்ததினால் பாடல்கள் “மருதகாசி-கா.மு.செரீப்” என இருவர் பெயரையும் ஒன்றாகவே குறிப்பிடப்பட்டு வெளிவந்தன.
திரைப்பயணம்
மாயாவதி பாடலுக்கு அடுத்து பாரதிதாசனின் திரைக்கதையில் 1950-ல் வெளியான ”பொன்முடி” படத்தில் அனைத்து பாடல்களையும் கவிஞர் மருதகாசியே எழுதினார். பாடல்கள் மருதகாசி-கா.மு.செரீப் என்றே வெளிவந்தன. "பொன்முடி" படத்தின் பாடல்கள் கவிஞருக்கு புகழைத்தேடித் தந்ததால் அடுத்தடுத்து நிறைய படங்கள் ஒப்பந்தமாயின. மு.கருணாநிதியின் “மந்திரி குமாரி"யில் பாட்டெழுதும் வாய்ப்பையும் பெற்றார். “வாராய் நீ வாராய், போகும் இடம் வெகுதூரமில்லை நீ வராய்” என்ற எதிர்மறைப் பாடலும் “உலவும் தென்றல் காற்றினிலே” பாடலும் எங்கும் ஒலித்து புகழைப்பரப்பின. அதன்பின் அன்றைய திரைநடிகரில் உச்ச நட்சத்திரமாய் கோலோச்சிய பாகவதரின் “அமரகவி”படத்திற்கும் பாடல்கள் எழுதி புகழினை நிலை நிறுத்திக்கொண்டார். பட்டி தொட்டியெங்கும் காற்றில் மிதந்தன மருதகாசியின் பாடல்கள். அன்றைய காலகட்டத்தில் எல்லா நிகழ்வுகளிலும் கூம்பு ஒலிபெருக்கியில் காற்றை நிறைத்து ஒலித்தன “மானுடக்கவி மருதகாசியின் பாடல்கள்”
தொடர் பட வாய்ப்புகள்
கவிஞரின் பாடலுக்கென்றே நிறைய படங்கள் புகழ்பெறத் தொடங்கின. பாகவதர் கலைவாணர் தொடர்ந்து சிவாசிகணேசன் அவர்களுக்கு ”தூக்குத் தூக்கி” படத்திற்கு பாடல் எழுதினார். அவை மேலும் கவிஞருக்குப் பெருமை சேர்க்க, தொடர்ந்து “தேவர் பிலிம்க்காக” MGR படங்களுக்கு பாடல் எழுத ஆரம்பித்தது மருதகாசியின் புகழை வேறொரு தளத்திற்கு கொண்டு சென்றது. MGR-க்கு கவிஞரின் பாட்டு வரிகள் மிகவும் பிடித்துபோக அவரின் அடுத்தடுத்த படங்களுக்கும் மருதகாசியே நிறைய பாடல்களை எழுதினார். தனது சென்னை வீட்டின் முன் நிற்கின்ற மகிழுந்துகளில், எந்த மகிழுந்தில் ஏறி எந்த நிறுவனத்திற்கு போவது என்று குழம்பும் நிலையில் அவரின் கவிவரிகளும் பொருளாதாரமும் கவிஞருக்கு புகழ்வெளிச்சம் தந்து ஆராதனைச் செய்தது அன்றைய திரைத்துறை. சொல்லப்போனால் தமிழ்த் திரையிசைப் பாடலாசிரியர் வரிசையில் உச்ச நட்சத்திரமாய் விளங்கினார். மருதகாசியை தவிர்த்து திரைத்துறை இல்லை எனும்படி பெரும்புகழுடன் வலம் வந்தார்.
பாடல் வரிகளில் சில.
தூக்குத்துக்கி படத்திற்கு “கண்வழி புகுந்து கருத்தினில் வளர்ந்து ”, "தாய்க்குபின் தாரம் படத்தின்”மனுசன மனுசன் சாப்பிடுறாண்டா தம்பிப்பயலே”, நீலமலைத் திருடன் படத்தின் “சத்தியமே இலட்சியமாய்க் கொள்ளடா”, ரம்பையின் காதல் படத்தின் “சமரசம் உலாவும் இடமே”, ராசா ராணி படத்தில் கலைவாணருக்கு எழுதிய “சிரிப்பு அதன் சிறப்பைச் சீர்தூக்கிப் பார்ப்பதே நம் பொறுப்பு” விவசாயி படத்தில் “கடவுளென்னும் முதலாளி கண்டெடுத்த தொழிலாளி விவசாயி” என ஆரம்பிக்கும் பாடல்களின் வரிகள் இன்றும் மேடைப்பேச்சுக்கு கைகொடுக்கும் பாடலாக இருக்கிறது. பாவை விளக்கு படத்திற்கு எழுதிய “காவியமா நெஞ்சில் ஓவியமா”, "மக்களைப்பெற்ற மகராசி"க்காக “மணப்பாறை மாடுகட்டி மாயவரம் ஏரு பூட்டி”, "பிள்ளைக் கனியமுதே" விற்காக “ஏர்முனைக்கு நேர் இங்கு எதுவுமே இல்லை”, வண்ணக்கிளிக்காக “மாட்டுக்கார வேலா”, மல்லிகா படத்திற்காக “நீலவண்ண கண்னா வாடா…” போன்ற பாடல்களும் மேலும் “மாசிலா உண்மைக் காதலே”, “உல்லாச உலகம் உனக்கே சொந்தம்”, ”சின்னஞ்சிறு சிட்டே எந்தன் சீனாகற்கண்டே”, ”அறிவுக்கு விருந்தாகும் திருக்குறளே”, “மனிதன் எல்லாம் தெரிந்துகொண்டான்”, “ஏரிக்கரையின் மேலே…”, “கண்ணை நம்பாதே உன்னை ஏமாற்றும்”, “சிரிப்பவர் பலபேர் அழுபவர் பலபேர்” இப்படி தாலாட்டு, காதல், தத்துவம், வேளாண்மை, சோகம், சிரிப்பு, தனிமை, கிண்டல் என்று எல்லா உணர்வுகளுக்கும் சுமார் 250 திரைப்படங்களுக்கு நான்காயிரம் பாடல் எழுதி பெரும் புகழும் அதற்கான பொருளாதர வளர்ச்சியும் பெற்றார் கவிஞர் மருதாகாசி. அன்றைய காலத்தில் உழவுத்தொழில் சார்ந்தப் பாடல்கள் மொத்தம் இருபத்தொரு பாடல்கள்தான் தமிழ்திரையிசையில் வெளிவந்திருக்கின்றன. அவற்றில் பதினேழுப்பாடல்களை மருதகாசிதான் எழுதியிருக்கின்றார்.
தனித்திறனும் நற்பண்பும்
சேலம் மார்டன் தியேட்டர் நிறுவனத்திற்கும் கவிஞருக்கும் மனகசப்பு ஏற்பட இனி மார்டன் தியேட்டர்க்கு எழுதுவதில்லை என்ற முடிவுடன் ஒதுங்கிக்கொண்டார். கவிஞரின் குணமானது மரியாதை கிடைக்காத இடங்களில் முட்டி மோதாமல் மென்மையாக ஒதுங்கி செல்வதேயாகும். அப்படிப்பட்ட நேரத்தில் மார்டன் தியேட்டர் “அலிபாபாவும் நாற்பது திருடர்களும்”படத்தை தாயாரித்தது. அதில் மருதகாசியைவிட சிறந்த கவிஞரை பாடல்கள் எழுத வைக்க முடிவுசெய்து “உடுமலை நாராயணகவி”யை அழைத்தது. உடுமலை மெட்டுக்கு எழுத மறுப்பவர். உடுமலை, மருதகாசியை அழைத்துக்கொண்டு மார்டன் தியேட்டர்க்கு சென்று இந்தப் படத்திற்கு பத்துபாடல்களில் ஒன்பது பாடல்களை மருதகாசி எழுதுவார். ஒரு பாடல் மட்டும் நான் எழுதுவேன் என்று மருதகாசி மீதிருந்த நட்பின் அடிப்படையில் சொல்ல, தன் குருவான உடுமலையின் சொல்லைத்தட்டாமல் பாடல் எழுதி தந்தவர் கவிஞர் மருதகாசி. ஒருமுறை ”நல்லவன் வாழ்வான்” திரைப்படத்திற்கு கவிஞர் “வாலி” பாடல் எழுதுகின்றார். அப்போதுதான் வாலிக்கு திரைத்துறையில் ஆரம்பகாலம், பாடலுக்கான காட்சி எடுக்கும்போது சிறு விபத்தாகி பாட்டு நிற்கிறது. மீண்டும் பாடல் ஒலிப்பதிவில் சிக்கலாகிப் போகிறது. வாலி புதியவர் என்பதால் ராசி இல்லையென்று ஒதுக்கப்படுகிறார். அதே பாடலை மருதகாசியை வைத்து எழுதுவது என்று முடிவாகி கவிஞர் அழைக்கப்படுகிறார். கவிஞரோ வாலி என்ன எழுதியிருக்கின்றார் என்பதைக் கேட்டு வாங்கி பாட்டுவரிகளை பார்க்கின்றார். வாலி சிறப்பாக எழுதியிருக்கின்றார் என்றும் இதையே ஒலிப்பதிவு செய்யுங்கள் என்று சொல்லி வாலிக்கு திரைவாசலை திறந்துவிட்ட நற்பண்புக்காரர் நம் “மானுடகவி மருதகாசி “. அப்படி வாலி எழுதிய பாடல்தான் “சிரிக்கின்றாள் இன்று சிரிக்கின்றாள்”.
படத்தயாரிப்பும் மன உளைச்சலும்
நிறைய படங்களுக்கு அனைத்துப் பாடல்களும் எழுதிய வகையில் கவிஞருக்கு முதலிடம் உண்டு. கவிராயர் மெட்டுக்குப் பாடல் எழுதுவது தனக்கு ஆகாது என்று ஒதுங்கிய பாடலுக்கும் மருதகாசிதான் தனது திறனைக் கொண்டு எழுதி வல்லமை பெற்றார். அப்பேர்ப்பட்ட கவிஞர் திரைத்துறையில் தயாரிப்பில் ஈடுப்பட்டதுதான் கவிஞருக்கு சறுக்கலாகிப் போனது. தன் நண்பர்களான கே.வி மகாதேவன், வி.கேமுத்துராமலிங்கம் மற்றும் வயலின் மகாதேவன் ஆகியோருடன் சேர்ந்து “அல்லி பெற்ற பிள்ளை” என்ற படத்தைத் தயாரித்தார். அப்படம் சரியாக ஓடாததால் பெரும் இழப்பைச் சந்தித்து எல்லாவற்றையும் இழந்து மனஉளைச்சலுக்கு உள்ளாகி திரைப்படத்திற்கு பாடல் எழுதுவதையும் விட்டுவிட்டு ஊருக்கு திரும்பி வேளாண்மையில் பொழுதைக் கழித்தார்.
மீண்டும் அரியணை
மருதாகாசி பொருளாதார நலிவுற்று இருப்பதை அறிந்த எம்.ஜி.ஆர்., மருதகாசியை அழைத்து வந்து மீண்டும் வாய்ப்பளிக்கின்றார். மருதகாசி மீண்டும் பாடல் எழுதி திரைத்துரையில் நிலை பெற்றார். அதற்கு அன்றைய மக்கள் திலகம் எம்.ஜி.ஆர். அவர்களின் பண்பே காரணம். எந்தச் சூழலிலும் வாய்ப்புக்காக அலைந்ததில்லை மருதகாசி. எல்லாம் தனது திறனால் அவரை வந்தடைந்தவை. எந்த முரணும் யாருடனும் இல்லாமல் திரைப்பயணத்ததை தொடந்தவர் நம் கவிஞர். தன் கடைசிக் காலம் வரை பாட்டு வரிகளால் திரைத்துறையில் ஆளுமையோடு இருந்து புகழொளியோடு வாழ்ந்தவர் மருதகாசி.
முடிவுரை
சற்றேறக்குறைய நாற்பது ஆண்டுகள் திரைப்படப் பாடலாசிரியராக கோலோச்சிய “திரைக்கவித்திலகம்” 1989-ஆம் ஆண்டு நவம்பர் 29ஆம் நாள் உயிர்நீத்தார். தான் எழுதிய பாடல்களால் இன்றும் தமிழாகவும் வாழ்ந்து கொண்டுதான் இருக்கின்றார். கவிஞரின் நூற்றாண்டு விழா சென்னையில் திரைத்துறையைச் சேர்ந்தவர்களால் 2020-இல் கொண்டாடப்பட்டது. 2007-ஆம் ஆண்டு கவிஞரின் திரையிசைப்பாடல்கள் அனைத்தும் “அரசுடமை” ஆக்கப்பட்டன. இன்னும் நூறாண்டுகள் ஆயிரமாயிரம் ஆண்டுகள் ஆனாலும் தமிழாய் வாழ்ந்துகொண்டுதான் இருப்பார், அந்த அரியலூர் மண்ணின் மேலக்குடிக்காடு ‘அய்யம்பெருமாள் மருதகாசி”
(நிறைவு)
கட்டுரைக்கு உதவிய திரட்டிகள்.
1.Wikipedia ( அ. மருதகாசி- தமிழ் விக்கிபீடியா)
2. திரைக்கவி திலகம் அ.மருதகாசி பாடல்கள்.
(பரணிப்பதிப்பகம் – சூலை 1986)
3.மருதகாசியின் நூற்றாண்டுவிழா கவிஞர்கள் உரை.
4. கவிஞர் பற்றிய you tube காணொளிகள்
5.தமிழ் விக்கிபீடியாவின் கவிஞர் பாட்டுவரிகள், வாழ்க்கை குறிப்புகள்.
எனது குறிப்புகள்.
அரியலூர் மாவடம் உகந்த நாயகன் குட்டிக்காடு என்ற கிராமமே எனது பிறப்பிடம். தற்போது சிங்கப்பூரில் கட்டடப்பணியாற்றுகின்றேன். இதுவரை “தேடலைச்சுவாசி” “நீ வைத்த மருதாணி” “அரங்கேறியச் சலங்கைகள்” “சிறகின் பசி” “காதல் தின்றவன்” என்ற ஐந்து கவிதை நூல்களை எழுதி வெளியிட்டு இருக்கின்றேன். இலக்கிய அமைப்புகளில் ஒன்றிணைந்து பணியாற்றி இருக்கின்றேன். சிறுகதை எழுதும் முயற்சியில் இருக்கின்றேன். எனது தொடர்பு எண்: 65 83371699 (சிங்கப்பூர்).
எனது மின்னஞ்சல் முகவரி : karunakarasu@gmail.com
சி.கருணாகரசு. உகந்த நாயகன் குடிக்காடு, அரியலூர் மாவட்டம்
| Tweet |
.jpg)
.jpg)
