நட்பு

நானும் அவனும்
நகமும் சதையும்
நான் நகம்
அவன் சதை .
வெட்டிவிட்டான் ...
நான் வளர்வதால் !


குறிப்பு ....
(படத்திற்கும் கவிதைக்கும் எந்த உள்நோக்கமும் இல்லை )
(கவிதை வாரமலரிலும் .... பின் எனது "தேடலைச் சுவாசி" நூலிலும்...இடம் பெற்றக் கவிதை )

Tweet

நாகரிகம்

துணிக்கடை பொம்மை

சேலையில் !

தொடைத்தெரிய உடுத்தியவள்

சாலையில் !

வெட்கப்பட்டது பொம்மை _இது

நாகரிக உலகின் உண்மை .

(இது ஒரு மீள் பதிவுங்க )

Tweet

முன்னேற்றம்?!

மாற்றங்கள் எல்லாம்
முன்னேற்றங்கள் ... அல்ல .

முன்னங்கால்கள் ...
கைகளாகி ,
முதுகு நிமிர்ந்த
மனித வடிவத்தை
முன்னேற்றம் என்பதில்
முழு உடன்பாடில்லை !.

அவன் ,
அக்கினியைக் கக்கும்
ஆயுதம் தூக்கி
பூமிப் பந்தை
காயப்படுத்த ...
முனையும் செயலை எப்படி
முன்னேற்றம் என்பேன் ?

எல்லைகள் தோறும்
வெள்ளைக் கொடி...
இதழ்களெல்லாம்
புன்சிரிப்பு .

மாறும் உலகில்
இவையிரண்டும்
மாறாதிருத்தலே...
முன்னேற்றம் !


(07- 08- 2004 இல் கவிச்சோலையில் பரிசு வென்ற கவிதை )

Tweet

செல்லமே...!

செல்லமே...!

எனக்கும் உனக்கும்

உடன்பாடு ஏதுமின்றியே ...

உற்ற துணையானோம் .

*
*

உனக்கு என் மீதும்

எனக்கு உன் மீதும்

ஏற்பட்ட பிடிப்பிற்கு

அன்பே ஆதாரம்.

*

*

என் முகம் காண

நீ மகிழ்வாய்

என் அரவணைப்பில்

நீ நெகிழ்வாய் ,

உன்னை ...

வாரியணைத்து

வாஞ்சையோடு கொஞ்சுவது

வழக்கம் எனக்கு .

*

*

எனக்காக காத்திருப்பதும்

என்னையே சுற்றிவருவதும்

உன் வாடிக்கை ,

உன் அருகாமையையும்

உன் தொடுதலையும்

விரும்புவது ... என் வாடிக்கை .

*

*

காலச் சூழல்

கடல் கடந்து வந்துவிட்டேன் ...

உன் பிரிவுத் துயரோடு .

என் பிரிவும்

உன்னை வாட்டலாம் .

... இருந்தும் கேட்கிறேன்

மனதளவில் இல்லாவிட்டாலும்

உடலளவிலாவது ...

நலமா ?

நன்றியுணர்வுள்ள ... என்

நாலுகால் செல்லமே ...!

(நான்கு ஆண்டுகள் முன்... என்மீது அன்போடு இருந்த நாய்க்குட்டியை பிரிந்து வெளிநாடு வந்த போது எழுதிய கவிதை .

இன்று அந்த குட்டி இல்லை ... ஆகையால் இந்த கவிதை என் நாய்க்குட்டிக்கு .... காணிக்கை . உண்மை படம் கிடைக்கவில்லை )

Tweet

தாரத்தின்... தாய்மை !

தாயகம் திரும்பும் ...

உன்னை

கணவனாக வழியனுப்புகிறேன் .

*

நீ ...

விமானம் ஏறும் அந்த

கடைசி நிமிடத்தில்

கையசைக்கும் போது

*

முந்தானையை பிடித்தோடும்

குழந்தையாய் ...

எனக்குள் பீறிடுகிறது

தாய்மையின் ஏக்கம் !

Tweet