அன்புடன் நான்

வெளிச்சம்!

2012-02-05T01:14:00.002+08:00

உடல் முழுதும் வலியேறி
உயிர்க் கொஞ்சம் வெளியேறி
உணர்வுப் பிழன்றத் தாயின்
இருண்டத் தருணத்தில்...
வெளிச்சமாகிறது!
சட்டெனக் கேட்கும்
பிள்ளைக் குரல்!.

சிங்கப்பூர்த் தமிழ் எழுத்த்தாளர்க் கழகமும் பெக்கியோ இந்திய சமூக நற்பணி மன்றமும் மாதந்தோறும் நடத்தும் “கவிச்சோலை” நிகழ்வில்“வேதனையில் விளைந்த வெளிச்சம்” கவிதை போட்டியில் பரிசு பெற்ற என் கவிதை (04-02-2012)

பொங்கல் கவிதை (காணொளி)

2012-01-14T08:13:00.001+08:00

வணக்கம்....

அனைவருக்கும் என் இனிய உழவர்தின வாழ்த்துக்கள்.
வானொலியில் வாசித்ததை புதிய காணொளியாக மாற்றியுள்ளேன்.
இதோ இருபுலன் மகிழ
என் கவிதை காணொளி!

வாழ்த்துக்குக்கள் கூறி
வாழ்த்துக்கள் வேண்டி விடைபெறுகிறேன்.

நன்றி.

புதியக் கொலவெறி

2012-01-03T20:15:00.002+08:00

எல்லோருக்கும் வணக்கம்.

தமிழ் மூலம் வாழ்வை செழிப்பாக்கிக்கொண்டவர்கள்..... தமிழ்திரை ஊடகத்தின் மூலம் தன் கோரப்பற்களைக் காட்டியக் கொலவெறிக்கு எதிரான எங்கள் ஆதங்க காணொளி.

வாரிசுகள்!

2011-12-20T17:45:00.000+08:00

இவர்...
வருமானத்தை,
குப்பையில் தேடுகிறார்.

வருமானம் பெரும்...
இவர் வாரிசுகள்,
குப்பையா(க்)கி விட்டதால்!.

தீ

2011-12-04T15:49:00.001+08:00

வேதியியல் ஆய்வகத்தில்,
தீப் பற்றிய
உன் தாவணியை....
சட்டென அணைத்து விட்டாய்.

எனக்குள்,
நீ பற்றி எரிவதை
என்ன செய்ய?!

வாழ்ந்த நாட்கள்!

2011-11-10T18:20:00.000+08:00

வணக்கம்...,

சிலகாலமாக வலைத்தளம் வர இயலவில்லை... நட்பின் துணையோடு சில பதிவுகளை வலையேற்றினேன். அதோடு கடந்த இரண்டு மாதங்களாக தாயகத்தில் குடும்பத்துடன் மகிழ்வோடு வாழ்ந்தேன்.... இனி தொடந்து வலையில் வருவேன்.

கடந்த இரண்டு மாதம் நான் வாழ்ந்த கணக்காகும்... அதற்கு சாட்சியாய் சிலபடங்கள்.

இனிய நன்றிகள்.

பண்டிகையும் பண்பாடும் ...(காணொளி)

2011-10-24T14:38:00.000+08:00

வணக்கம்...

பண்டிகையும் பண்பாடும் என்ற தலைப்பில் சிங்கப்பூர் வானொலியில் நான் கலந்து கொண்டு ஆற்றிய கவியரங்கத்தின் காணொளி...

உறவுகள் அனைவருக்கும் எனதினிய தீப ஒளி திருநாள் வாழ்த்துக்கள் ...

பாரதி நினைவரங்கம் (காணொளி)

2011-09-24T12:30:00.000+08:00

வணக்கம்....

பாரதி 126 நினைவரங்கில் பாரதி என்னும் பொதுத்தலைபில் "பாரதியின் பராசக்தி" என்று நான் வாசித்த கவிதை.
இடம்... உமறுப் புலவர் தமிழ்மொழி கல்வி நிலையம் , சிங்கப்பூர். (2008)

பிறந்த நாள்

2011-09-12T00:25:00.001+08:00

வணக்கம்,

இன்று (12-09-2011) என் மகன் சி.க.இளங்கதிர் க்கு முதலாண்டு பிறந்த நாள்.

இளங்கதிர் சில பகிர்வுகள்... எங்கள் உலகம், மனமார்ந்த நன்றியும் சி.க. இளங்கதிரும்

முதல் “மாத” பிறந்தநாளின் போது.

ஆறாம் “மாத” பிறந்தநாளின் போது (அரை வயது)

பிறந்த நாள் கொண்டாடுவதில் உடன்பாடில்லாத நான் ... தேடலின் காரணமாக வெளிநாட்டில் இருப்பதால், உருவாக்கிக் கொண்ட மகிழ்ச்சி தருணங்கள் இவை.

முதலாண்டு பிறந்த நாளுக்கு தயாராகிறான் சி.க இளங்கதிர்.

யார் குற்றவாளி (காணொளி)

2011-08-30T14:27:00.003+08:00

வணக்கம்....

செங்கொடி மரணத்தை தாழ்வுபடுத்தாதீர்கள்.

அவர் போல் யாரும் தழலில் சிக்காதீர்கள்.

இந்த காணொளியில் நம் நாட்டு புலனாய்வு திறனை காணலாம்.

தமிழர்களின் “ஒன்றினையாமை”யால் என்ன நிகழ்ந்துள்ளது என்பதையும் உணருங்கள். நன்றி

( காணொளி இதுதான்)

நன்றி... குமுதம்.காம்

நெருப்பில் நிலவு

2011-08-19T08:35:00.002+08:00

(வெண்பா)

நெஞ்சுரம் நேர்மையோடு நேர்க்கோட்டில் நின்றெழுதி

வஞ்சமதை வேரறுக்கும் வர்க்கமது- அஞ்சா

கருத்தியல்பைக் கொண்டக் கவிஞன் முகமே

நெருப்பில் தெரியும் நிலவு.

நன்கொடை

2011-08-01T17:33:00.001+08:00

அமிழ்தத்தில் சரியளவு

நச்சுக் கலந்து
அருந்தியவன் நிலையில்
அருந்தமிழ் இன்று.

வெகுசன ஊடகமாம்
தமிழ்த்திரை உலகில்
பல்லி விழுந்த
பாலைப் போல
பாடல்கள் பல.

வீரியத் தமிழில்
கலப்படம் செய்து
வியாபாரம் செய்யும்

கவி மேதாவிகளே!

உங்களின்
கலப்படத்தால்
காயப்படப் போவது
மொழி மட்டுமல்ல - நம்
இனமும்தான்.

ஏனெனில் “மொழி”

இனத்தின் அடையாளம்.

மொழியில் கலப்படம்
மொழிவளர்ச்சிக்கு வேகத்தடை!
கலப்படம் தவிர்த்தலே
மொழிக்குச் செய்யும் நன்கொடை!!

நாகரீகம்!

2011-07-21T17:32:00.004+08:00

பெண்ணே, உடலின் பெரும்பங்கைக் காட்டலாமா?
கண்ணை உறுத்தக் கடைவிரித்து- மண்முதல்
விண்ணுயர்ந்த நம்பெருமை வீணாக்கும் உன்னால்நம்

பண்பின் வலிமைக்கே பாழ்

(எனது தேடலைச்சுவாசி நூலிலிருந்து)

உறுதி (குறும்படம்)

2011-07-07T20:05:00.001+08:00

உறுதி
(எழுத்துவடிவம்)

கருங்கல் சர்லியில் இரும்புச் சக்கரம் உருளும், மறமறவென்ற ஒலி நெஞ்சைஅரைக்க... அடர்கருப்பு திரையில் எழுத்துக்கள் தோன்றித்தோன்றி மறைகிறது.

ஆங்காங்கே நட்சத்திர மின்னலாய் புள்ளிப்புள்ளி வெளிச்சங்கள். தூர வெளிச்சங்களை நோக்கி நகர்கிறது காட்சி, நட்சத்திர மின்னல்கள் இப்போது ராட்சித தீப்பிழம்பாய் அனல் கக்கி கரும்புகை உமிழ்கிறது. சற்று தூரத்தில் ஒரு ஐந்து வயது பெண்பிள்ளை பரட்டைத்தலையோடு மூக்கை அழுந்த துடைத்து இருமி அழும் போது நமக்கும் அந்தக் கந்தகநெடி மூக்கை அரிக்கிறது.

இராணுவத்தின் கவச வாகனங்கள் வரிசைப்பிடித்து விரையும் ஓர் சாலையில், கரும்புகை இடையே... ஒரு சாலை பலகை வந்துபோகிறது. அதில் வவுனியா என்ற பழைய எழுத்துக்கள். சாலை ஒரு பக்கத்தில் மரணபயத்துடன் மூட்டைமுடிச்சியை சுமந்தவாறு திரளான மக்கள் ஓட்டமும் நடையுமாய். சிலர் குழந்தைகளை தூக்கிக்கொண்டு. அத்தனை முகங்களிலும் அப்பிக்கிடக்கிறது ஆற்றாமை.

(காட்சி மாறுகிறது)
இடிந்த கட்டிடங்கள் சில கூரை வேயப்பட்ட வீடுகள் பெருவாரியான மக்கள் வாழ்ந்த இடமாக தெரிகிறது... ஆனால் மக்கள் நடமாட்டமில்லை.

ஆங்காங்கே சின்னச்சின்ன தீச்சுவாலையுடன் புகைந்துகொண்டிருக்கிறது. அது நேற்றைய பெருநெருப்பாய் இருக்கலாம். படல்வேலி அமைக்கப்பட்ட ஓட்டு வீடு அதன் பக்கத்தில் பழைய கோயில்.
மேலுடுப்பு இல்லாத பழுத்த முதியவர் கோயில் திட்டில் தூணோடு சாய்ந்திருக்கிறார் தளர்ந்த நிலையில். தூணில் அவரின் கைத்தடியும் சாத்திவைக்கப்பட்டுள்ளது. முதியவரின் காலடியில் ஒரு நாய் தலையை கீழேவைத்தப்படி படுத்திருக்கிறது.
திடீரென நிலம் அதிரும் சத்தத்துடன் புகைகக்கியப்படி ஏதோ ஒன்று கோயில் நோக்கிவர... விசுக்கென படலில் புகுந்து தெரித்து ஓடுகிறது நாய். புகைகக்கி வந்த அது, வெடித்து கரும்புகைக்கக்கி நெருப்பை உமிழ்கிறது. புகைக்கு இடையே முதியவரின் கைத்தடி ஏதோ பிசுபிசுப்புடன் தெரிகிறது.

                                                         (காட்சி மாறுகிறது)
ஆங்காங்கே மரங்கள் உள்ள நிலபரப்பு... சில பனைமரங்கள் பாதியாய் கிழிந்து கிடக்கிறது. எரிந்த வாகனத்தின் கூடு கிடக்கிறது.... எங்கும் திரளான மக்கள் குழுவாய் கூட்டமாய் அலைமோதியப்படி. தொடரான துப்பாக்கி சத்தம்... விட்டுவிட்டு வெடிசத்தம் நிலம் கிழிக்கிறது. கந்தக நெடியோடு பக்கத்தில் இருப்பவரை காண இயலாத புகையின் அடர்த்தி. மூட்டை முடிச்சோடு மக்கள் ஒரு புள்ளியை நோக்கி நகர்த்தப்படுகிறார்கள்.

மக்களுக்கு இடையே இராணுவவீரர்கள் தென்படுகிறார்கள் கையில் துப்பாக்கியும் முகத்தில் புகை கவசத்துடனும். ஒரு சின்ன மரத்தின் கீழ் தன் மகளை தோளில் சாய்த்தப்படி நடுத்தர வயதுகாரர். மகளுக்கு ஏழெட்டு வயதிருக்கலாம் அழுக்கடைந்த பாவாடை சட்டையுடன். இருவருமே தாகம் பசியால் மயங்கிய நிலையில் மர நிழலின் கீழ் இருக்கின்றார்கள்...
ஒருகை, அந்த நடுத்தர வயதினரின் தோள்தோட்டு மறுகையால் தண்ணீர் குடுவையை நீட்டுகிறது. தண்ணீரை ஆவலோடு வாங்கிகொண்டவர் தன் மகளின் வாயருகே கொண்டுச்செல்கிறார். தண்ணீரை குடிக்க எத்தணிக்கையில் அந்த சிறுமியின் கண்ணில் படுகிறது தண்ணீர் வழங்கியவனின் கால்பகுதி அது உடுத்தியிருப்பது ஆம்மி சீருடை ...
வலதுகையால் தண்ணீர் குடுவையை விலக்கிவிட்டு மீண்டும் தந்தையின் தோள்மீது சாய்ந்து விடுகிறாள்... அந்த சிறுமி.

                                     மீண்டும் திரையில் எழுத்துக்கள்.....

கவியரசு கண்ணதாசன்

2011-06-23T18:28:00.001+08:00

கவியரசு (24-06-1927)----- (17-10-1981)

செம்மொழியை எழிலோடுச்
சீர்மிகு வடிவோடு
காவியங்களாய்த் தந்தக்
கலையரங்கம்.

தன்மூச்சு உள்ளவரை
தரமானப் படைப்புகளை
தரணிக்குத் தந்திட்டக்
கவியரங்கம்.

அவன்-இவன்

2011-06-17T23:59:00.000+08:00

அவன் இவன் எப்போதும் போல பாலாவின் தனி முத்திரை.

மெல்லிய அன்பின் அடர்த்தியை “வலி”மையான அழகியலாக்கி இருக்கின்றார் பாலா.

அவன் - இவன் .... வெல்ல பிறந்தவன்.

எங்க வீட்டு பிள்ளைகள்

2011-05-30T21:47:00.000+08:00

மறைந்த என் அண்ணன் திரு சி.திருவேங்கடம் அவர்களின் இளைய மகன் தி.தமிழருவி,
இவ்வாண்டு 10 ஆம் வகுப்பு பொது தேர்வில் 464 மதிப்பெண்கள் பெற்று சிறந்த முறையில் தேர்வுப் பெற்றுள்ளான். அவனிடம் வாழ்த்தையும் மகிழ்ச்சியையும் பகிர்ந்துகொள்ள இயலாத உறவு(!) சூழலின் வெளிப்பாடு இது .... அவனை மனதார வாழ்த்துங்கள்.
இவன் சென்ற ஆண்டு 448 மதிப்பெண்கள் பெற்ற தி.தமிழ் உண்மை சிந்து வின் தம்பி ஆவான்.

மகன் தமிழருவிக்கு இனிய வாழ்த்துக்கள்

தி .தமிழருவி

மற்றும் என் இன்னோரு அண்ணன் திரு சி.மேகநாதன் அவர்களின் இளைய மகள் மே.மணியரசி இவ்வாண்டு 10 ஆம் வகுப்பு பொது தேர்வில் 446 மதிப்பெண்கள் பெற்று சிறந்த நிலையில் வெற்றி பெற்றுள்ளார். மகள் மணியரசிக்கும் என் வாழ்த்துக்கள்.......

மே.மணியரசி.

எங்க வீட்டு பிள்ளைகளை வாழ்த்துக்கள்!

ஒரு மகிழ்சியான தருணத்தில்... தமிழருவி எனக்கு ஊட்டிவிடுகிறான்

அதேதருணத்தில் தமிழ் உண்மை சிந்து எனக்கு ஊட்டி விடுகிறான்.

மிக்க நன்றி.

போர்க்குற்ற நாள்

2011-05-18T08:01:00.001+08:00

இன்று....
ஈன இனமது- நம்
ஈழ இனத்தை கொன்ற நாள்!
உயிரிருக்க உடல் தின்ற நாள்!!

(எதிரியின் போர்க்குற்றத்தால் கொத்து கொத்தாய் மடிந்த என் உறவுகளுக்கு என் வீர வணக்கம்)

மக்கள் கவிஞர், வானொலி கவியரங்கம்

2011-04-12T17:30:00.011+08:00

கவியரங்கம்

படம்......................... மகாதேவி
பாடல்... ...................குறுக்கு வழியில்
பாடலாசிரியர்.... .மக்கள் கவிஞர்
பட்டுக்கோட்டை கல்யாண சுந்தரம்.
படைப்பு.... .............சி. கருணாகரசு.

மக்கள் கவிஞருக்கு நாளை 13-04-2011.
81 ஆம் பிறந்த நாள்.... அதனை முன்னிட்டு இந்த படைப்பு.

கண்ணீர் கரைந்த தருணம் 2 (சொற்கள் தேவையற்ற பகிர்வு)

2011-04-03T02:51:00.000+08:00

நரைமுடி

2011-03-23T17:00:00.000+08:00

அடர்காடாய் இருந்தாலும்
அடர்காட்டில் இருந்தாலும்
அதிசயமாய் வளரும் “பட்ட மரங்கள்”

பெண்பாக்கள், மகளிர் தினம்

2011-03-07T17:44:00.001+08:00

சீதை
ஆணாதிக்கத்தால்
அக்னியில் குளித்தெழுந்த
அனிச்சம்.

திரெளபதை
ஐவர் பகிர்ந்துக் கொண்ட
ஒற்றை இதயம்!

குந்திதேவி
கர்ணனை அனாதையாக்கி
“கன்னி”யம்! காத்தவள்.

காந்தாரி
இவளவன்
கண்கள் இரண்டால்
இவளும்
கண்கள் இருண்டாள்.

சூர்ப்பநகை
மூக்கறுப்பட்ட
முதல் காதல்!

அகலிகை
“கல்”லானாலும்
கணவன் என் கிடந்தவள்.

கண்ணகி
மதுரை ஓவியத்தை அழித்த
கற்புத் தூரிகை!

மாதவி
கணிகை குலத்தில் பிறந்த
கண்ணகி!

மணிமேகலை
கணிகை குலமும்
வணிக குலமும்
கலந்து செய்த
கடவுள் குலம்.

அமராவதி
காதல் வாசித்த
இரங்கற்பா.

கிளியோப்பாட்ரா
அரியனை யுத்தத்திற்கான
அழகு ஆயுதம்.

டயானா
ஆங்காங்கே கிழிக்கப்பட்ட
அழகியல் புத்தகம்.

அன்னை தெரசா
நிராகரிக்கப் பட்டவர்களின்
நிராகரிக்கப்படாத
கருணை மனு!

இந்திராகாந்தி
வேலியால் விழுந்த
வீரிய விருட்சம்

ஆங்சாங் சுகி அம்மையார்
உரிமைக்காக போராடும்
உயிரியல் பர்மா தேக்கு!

கிரண்பேடி
இருண்ட சிறையினுள்
புகுந்த வெளிச்சம்!

சான்சி ராணி
வல்லினம் மிரண்ட
மெல்லினம்.

ஒளவையார்
போர் முரசை தவிர்த்த
தமிழ் முரசு.

கல்பனா சாவ்லா
விண்வெளி லயித்த
கொலுசொலி!

பார்வதி (என் அம்மா)
என்
வரங்களுக்காகவே
வாய்த்த கடவுள்!

(இவைகளில் ஏதேனும் தவறாக பொருள் தந்தால் குறிப்பிடவும் திருத்திக்கொள்ளலாம்)

புதிய பார்வை

2011-03-01T17:47:00.002+08:00

எழுத்துக்கள் பெரிதாக்க படத்தின் மேல் அழுத்தவும்.

நன்றி

மதுவெண்பா

2011-02-21T19:01:00.002+08:00

வெண்பாக்கள்

நரம்புகளைச் சூடேற்றி நட்பைக் கெடுக்கும்
வரம்புமீறி வம்பை வளர்க்கும் - நரகச்
சினமேற்றி வாழ்வதனைச் சீரழிக்கும் போதை
உனக்கேன் மதுவை ஒதுக்கு.

பொருளைக் கரைக்கும் புகழைச் சிதைக்கும்
குருதியில் நச்சினைக் கூட்டும் - உறுப்பில்

பதுங்கி உயிரைப் பறித்தே அழிக்கும்

மதுவைத் தவிர்த்தலே மாண்பு!.

கவியரங்கம் (காணொளி)

2011-02-18T19:16:00.002+08:00

வணக்கம்,

சிங்கப்பூரில் மாதவி இலக்கிய மன்ற கலை நிகழ்வில்... கவிமாலை அமைப்பின் கவியரங்கம்.

பொது தலைப்பு.... “தமிழ்த்தாய் கண்ணீர் வடிக்க காரணம்”

நான் பேசிய தலைப்பு “ஊடகமே”

கண்ணீர் கரைந்த தருணம் 1

2011-02-10T18:18:00.006+08:00

வணக்கம்....

(இது என் முதல் கட்டுரை வடிவம்)

இந்த நிகழ்வு நிகழ்ந்து கால் நூற்றாண்டை நெருங்குகிறது....
ஆனால்... ஏதாவது ஒரு தருணத்தில் மனதில் தோன்றி புத்தியில் உரைத்து... நெஞ்சை கீறுகிறது....

எனக்கு அப்போது பத்துக்கும் குறைவான வயது.... என் கிராமத்திற்கு பக்கத்தில் உள்ள செந்துரை என்னும் நடுத்தர நகரத்தில்.... ஸ்ரீராம் நர்சரி பள்ளியில், இரண்டாம் வகுப்போ அல்லது மூன்றாம் வகுப்போ (தமிழ்வழி கல்வி) படித்துக்கொண்டிருந்தேன்....

பள்ளி தொடங்கிய ஓரிரு மாதத்தில் புதிதாக ஒரு மிஸ் (ஆசிரியர்) வந்தாங்க.
அவங்களும் மற்ற ஆசிரியர் போலவே மிரட்டலாக இருப்பார்கள் என் நினைத்து பயந்தேன். அவுங்க எங்களிம் பழகியவிதம் சொல்லிகொடுத்த பாங்கு.... அப்படி ஒரு ஆசிரியரை அதன்பின் சந்திக்கவே இல்லன்னு சொல்லலாம்.
அவங்க தான் சுசீலா மிஸ். வயது 20 திலிருந்து 22 இருக்கலாம். மிதமான அழகு ஆனா அவங்கதான் எங்களுக்கு தேவதை... அவங்களுக்கு எல்லோரையும் பிடிக்கும் என்னை கூடுதலா பிடிக்கும். எங்களுக்கும் அவங்கள ரொம்ப பிடிக்கும்... எனக்கு ரொம்ப ரொம்ப பிடிக்கும். நாந்தான் அவங்க செல்லம் அவங்க வீட்டுக்குகூட என்னை அழைத்து போயிருக்காங்க.
பள்ளிக்குக் பக்கத்திலேயே தங்கியிருந்தாங்க. அவங்களுக்குத் தேவையான பள்ளிச் சம்மந்தப்பட்ட சில பொருட்களைக் கூட என்னைதான் வாங்கி வரசொல்லுவாங்க. ஒருமுறை கிருஷ்ணன் படம் போட்ட பொங்கல் வாழ்த்து வாங்கி தந்திருக்கேன். (விலை 20 காசுகள்) பள்ளி கலை நிகழ்வுகளிலும்,விளையாட்டிலும்,பாடங்களிலிலும் தனக்கான பங்கை மிக நேர்த்தியாக செய்தார் சுசீலா மிஸ்.

மற்றும் சுசீலா மிஸ் வராத நாட்கள் மிக ரணமாக நகரும்... அவர்களைக் கண்டால் புதிய உற்சாகம். பாடம் படிக்காவிட்டால் அடிக்க மாட்டாங்க... கோபித்து கொள்வார்கள். பேச மாட்டாங்க அதற்காகவே எப்படியாவது படித்து விடுவோம். அபோதெல்லாம் பள்ளிகளில் சிறுசேமிப்பை ஊக்குவிக்கும் நடைமுறை உண்டு.
நாங்களும் அதில் பங்கெடுத்துக் கொண்டோம். எங்களுக்கான சேமிப்பு கணக்கை எங்க சுசீலா மிஸ் தான் பாத்துகிட்டாங்க. எங்களுக்கு கிடைக்கும் 10காசுகள்,20 காசுகளை சுசீலா மிஸ்கிட்டதான் கொடுத்து வைப்போம் அவங்களும் ஒரு நோட்டுல எழுதி வைப்பாங்க...

சனி, ஞாயிறு விடுமுறை முடிந்து திங்களன்று பள்ளிக்கு சென்றோம்.
மற்ற மிஸ்களிடம் ஒரு இறுக்கம் காணப்பட்டது. எங்க சுசீலா மிஸ் இன்னும் வரல பள்ளித் தொடங்கும் முன் தமிழ்த்தாய் வாழ்த்துக்காக வரிசையில் நிற்கவைக்கப்பட்டோம். தமிழ்த்தாய் வாழ்த்துக்கு முன் உஷா மிஸ் சுரத்தே இல்லாமல் பேசினாங்க . நம்மோடு ... .... ..... வாழ்ந்த சுசீலா மிஸ் நேற்று இறந்துட்டாங்க.... ..... ... நான் அழுதேன் வழிந்தோடிய கண்ணீரை மேல்சட்டையின் நுனிகளால் துடைத்துக்கொண்டே பள்ளியை விட்டு வெளியேறினேன்...(அனைவரும் வெளியேறினோம். அன்று விடுமுறை) சற்று தூரத்தில் இருந்த சுசீலா மிஸ் வீட்டு பக்கம் போனேன், அவங்க வீட்டு முன்னாடி அவங்களை குளிப்பாட்டிய ஈரமும்... நிறைய மலர்களும். அந்த ஈரமும் மலரும் போலவே என் கண்ணீரும் உலர வீடுதிரும்பினேன்.

கால் நூற்றாண்டாகியும் என்மனதில் இறுக்கமாய் இருக்கும் அந்த தேவதையிடம் நான் கேட்க நினைத்த... நினைக்கும் கேள்விகள்.

1. ஏன் மிஸ் எங்கள விட்டுட்டு போயிட்டிங்க?
2.அதுக்குதான் வெள்ளிக்கிழமை எங்க சிறு சேமிப்பை திருப்பி தந்திங்களா மிஸ்?

(சுசீலா மிஸ் இறந்தது ஞாயிற்றுக்கிழமை... இயற்கைக்கு மாறான மரணம்)

இது எங்கள் தேவதை சுசீலா மிஸ்க்கான... நினைவேந்தல்.

மீனவர் வாழ்வு? (சீருடை மிருகம்)

2011-01-31T12:00:00.028+08:00

ஓ........
சீருடைத் தரித்த
சீர்கெட்ட விலங்கே!

நீ...
தரையில் குடித்த
தமிழ் ரத்தம் போதாதென்றா
கடல் பக்கம்
நீட்டுகிறாய் உன்
நீண்ட நாக்கை?

எங்கள்...
ஓட்டு பொறுக்கிகளின்
மெத்தனத்தால்,
உயிர்பொறுக்கியாய் திரியும்
ஓநாய் கூடங்கள் நீங்கள்!

இன்று...
தன்மானம் பகை நெருப்பில்
எரிகிறது!
தமிழீழத்தின் அவசியம்
புரிகிறது!!

உலகே பகையை கண்டு கொள்!
உலகே பகையை கண்டுக் கொல்!!

எழுத்து... நான்,
இயக்கம்... மாணவன்,வெறும்பய(ஜெயந்த்)

காலபோக்கில்....

2011-01-28T12:30:00.002+08:00

கண்ணுக்கு தெரியும்
திருவிழா பொம்மைகள்
கைக்கு எட்டாத
ஏமாற்றம்!

உயிர் கொதிக்கும்
பசிநேரத்திற்கு பின்னே
உலை கொதிக்கும்
காலதாமதம்!

அடிப்பட்ட சுவடோடு
எழுந்து நின்றாலும்
தொடர்ந்து கைகுலுக்கும்
தோல்வியின் முகவரி!

இப்படியாகச் சில
எம்வாழ்வில் சுழன்றடிக்க...
சூராவெளியிலும் வலைவீசும்
சூட்சமம் கற்றுகொண்டோம்.!
துயரங்கள் எதுவந்தாலும்
துணிவோடு எதிர்த்து நின்றோம்!

இன்றோ....

கண்ணுக்கு எட்டாததுகூட
கைகளில் தவழுது!

கால் அரை பசியின்றி
காலமும் கழியுது!

வெண்பஞ்சு பாதையிலே
வென்றிட துடிப்பதனால்...

மணல்திட்டை கூட
மலையென நினைக்குது!
மனசுக்குள் காயமென்றால்
மரணத்தையே வளைக்குது!

தென்றலுக்கே ஒடிந்துவிடும்
தழும்பில்லா தளிர்களே...!

காயங்களையும்....
கற்றுகொள்ளுங்கள்!
அது...
காலபோக்கில் வினைபுரியும்!
காலம்முழுதும் துணைபுரியும்!!

சென்ற ஆண்டு பதிவர் திரு சங்கவி எழுதிய ஒரு கட்டுரையின் பாதிப்பில் உருவானக் கவிதை.
நன்றி சங்கவி.

பொங்கல் கவியரங்கம், வானொலியில் நான்,

2011-01-13T10:30:00.002+08:00

வணக்கம்.... அனைவருக்கும் என் இனிய பொங்கல் நல் வாழ்த்துக்கள்.

சிங்கப்பூர் வானொலியில் பொங்கல் தின கவியரங்கம்..... அதில்...நான் பாடிய கவிதை
நான்கு நிமிடம்தான் கேளுங்க.....

முகம்

2011-01-06T19:59:00.000+08:00

ஐம்புலன்களின்
ஆட்சி பீடம்.
அசையும் தேசத்தின்
தலைநகர்.
ஐந்தடிக் கவிதையின்
ஓரடித்தலைப்பு.
அக உணர்வை
பிரதிபலிக்கும்
புறக்கண்ணாடி.
உயர்திணை மரத்தின்
அதிசய உச்சிவேர்.
உடல் என்னும்
உறையில் எழுதிய
உயிர் முகவரி.
...
இருந்தும் ஓர் குறை
இன்றுவரை
இதற்கே தெரியாது
இதன் அசல்.

(எனது தேடலைச் சுவாசி நூலிலிருந்து)

தாகமெடுத்த தண்ணீர்! (சுனாமி நினைவு)

2010-12-26T03:22:00.004+08:00

குடியிருந்த வீடும் போச்சு
கூண்டோடு ஊரும் போச்சு
பழகிய முகங்கலெல்லாம்
பலதிசையில் சடலமாச்சி
இதையெல்லாம் பார்க்கத்தானா
என்னை மட்டும் விட்டுபோச்சு?

தங்கமே தங்கமென்று
தாலாட்டி வளர்த்த ரெண்டு
பிள்ளைகள் உயிரைக்கொண்டு
போனதே பேயலை இன்று!

தாய் தகப்பன் தண்ணியோட
தம்பியவன் மன்ணுக்குள்ள
நான் மட்டும் கரையொதுங்கி
நாதியற்று போனேனே.

அந்திக்கு வீடுவந்தா
அன்போட செல்லமக
கழுத்தை கட்டிக்கொண்டு
கன்னத்தில் முத்தமிடும்.
முத்தமிடும் சிரிப்பலையை
முறித்துவிட்ட பேரலையே!
இனி...
அந்திவரும் நாள்தோறும்
அந்த முத்தம் யார்தருவா?

நீரும் நிலமும்
நிகழ்த்திய வன்முறை...
கல்லறையானதே - ஒரு
கடலோர தலைமுறை.

தாங்காது கடலம்மா!-நீ
தந்த துயர் போதுமம்மா.
இன்னோரு முறைவந்தா
ஏமாந்து போயிடுவ
மனிதரெல்லாம் மாண்டபின்
மறுபடி நீ என்ன செய்வ?

தாகம் தீர்ந்ததா தண்ணீரே!?
உன்னால்...
தரணி சிந்துதே கண்ணீரே!.

(ஆழிப்பேரலை அஞ்சலிக்காக வாசிக்கப்பட்ட கவிதையில் சிலதுளிகள்)

தாஜ்மகால்

2010-12-13T10:55:00.002+08:00

ஆங் சாங் சூகி அம்மையார்

2010-11-23T19:44:00.000+08:00

உறுதியை வேராக்கி
உயர்ந்து நின்று ...
உரிமைக்காய் போராடும்
உயிரியல் பர்மா தேக்கு!

(நண்பர்களே.... அவ்வபோது வலைவரமுடிய வில்லை ..... நானும் இருக்கிறேன் என்பதற்காக இப்பதிவு .... )

மனமார்ந்த நன்றியும் சி.க.இளங்கதிரும்.

2010-10-28T17:31:00.000+08:00

என் மகன் இளங்கதிர்க்கு வாழ்த்தையும் .... பெயர் பரிந்துரையும் அளித்த மதிப்பிற்குரிய வலைபதிவர்கள் அனைவருக்கும் என் குடும்பத்தின் மனமார்ந்த நன்றி! நன்றி!! நன்றி !!!

தானியங்கி முறையில் பதிவேற்றிய என் பதிவுக்கு கருத்துரைத்த உங்கள் அனைவருக்கும் என் நன்றிகள் .

நான் இருக்குமிடத்தில் இணைய தொடர்பின் வீரியம் சரியில்லாததாலும் ... இணைய தொடர்புக்கு வரஇயலாத சூழலாலும் ... உங்களோடு கைகுலுக்க இயலாமைக்கு வருந்துகிறேன் .

நான் எனது விடுமுறையை தீபாவளி வரை நீட்டித்துள்ளேன் . கிடைக்கும் இந்த நேரத்தை என் மகனோடு செலவிடுகிறேன் .

இதோ ... உங்க பார்வைக்கு
என் மகன் இளங்கதிர் . (சி.க.இளங்கதிர், s.k.elangathir)

எனக்கு பெயர் பரிந்துரை செய்தவர்களுக்கும் ... என்னை வாழ்த்தியவர்களுக்கும் ...என் வணக்கம் . அன்புடன் சி.க.இளங்கதிர் .

உங்க வாழ்த்தினால் நான் மகிழ்வோடு இருக்கிறேன்.

உங்கள் அனைவருக்கும் டாடா .....
என்னைப்பற்றிய என் அப்பாவின் கவிதையை  படிங்களேன் .

                 அசைகள் இல்லாத
                 கவிதைகளே ... இல்லை .
                 உன்,
                அசைவுகளை மிஞ்சிய
                 கவிதைகளும் இல்லை.

வானொலியில் நான். (ஆட்டோகிராப்) (சினேகன்)

2010-09-28T18:05:00.002+08:00

வணக்கம் ,
சிங்கப்பூர் வானொலி ஒலி 96.8 ல்.... “ஆட்டோகிராப்” படப்பாடலைப் பற்றிய எனது கண்ணோட்டம்.
இது “கவிஞர் நேரம்” நிகழ்ச்சிக்காக ஒலியேறிய படைப்பு. ( பாடலுடன் )

படம் :ஆட்டோகிராப்
பாடல் :கிழக்கே பார்த்தேன் விடியலாய் இருந்தாய் அன்புத்தோழி
பாடலாசிரியர்: திரு சினேகன்
படைப்பு :சி.கருணாகரசு.

எங்கள் உலகம்! (எந்த பெயர் சூட்டலாம்? )

2010-09-15T15:45:00.001+08:00

வணக்கம்....

செப்டம்பர் 15 .... எங்கள் வாரிசின் வருகைக்கென... மருத்துவர் குறித்த தேதி.
செப்டம்பர் 12... நாங்கள் பெற்றோரான நாள்.

எங்கள்...
அன்பணுக்களின் கலகம்!
அதில் வந்த...
இவனே...
இனியெங்கள் உலகம்!!

உலகுக்கு இவன்
புது வரவு!_எங்கள்
உயிருக்கு இவனே
முதல் உறவு!!

ஈர...
தொப்பூழ் கொடியுடன்
உன்னை ஏந்திய தருணம்
ஏனோ கண்ணீர் கசிந்தது!

எனக்குள் இருந்த
எல்லாத் துயரும்
அந்த நொடியில் நசிந்தது!!

பாலினம்... ஆண்

எடை .... 3.600 கிலோ
பிறப்பு வகை.... இயல்பு வகை... (அதாவது ஆயுதமின்றி)

என்ன பெயர் சூட்டலாம்?

இருபாலினத்திலும்... பெயர்களை தெரிவு செய்து வைத்திருந்தோம்.
குழந்தை பிறந்த இரண்டாம் நாளிலிருந்து பெயருக்கான ஓட்டெடுப்பு நடைபெறுகிறது
இந்த எழுத்தில் இப்படிதான் இருக்க வேண்டும் எந்த வரையறையும் வகுத்துக்கொள்ள விருப்பவில்லை
பெயர் நல்ல தமிழ் பெயராக சுருக்கமாக இருக்கனும். எளிமையா இருக்கனும்....
ஆகையால் கீழே உள்ள 4 பெயர்களில் உங்களுக்கு பிடித்த ஒரு பெயரை தேர்வுசெய்யுங்கள்... எந்த பெயர் அதிக ஓட்டு பெருகிறதோ... அந்த பெயரைதான் சூட்டுவோம்.

1.இளங்கதிர்

2.நாவலன்

3.முகிலன்

4.செழியன்.

எங்கள் பகுதியில் குழந்தையை பார்க்க வரும் உறவினரும் நண்பர்களும் குழந்தையின் கையில் பணம் வைத்துதான் தூக்குவார்கள்....(இது சடங்காம்?) அதில் எனக்கு உடன்பாடில்லாததால்..... இப்படி எழுதி மருத்துவமனையிலும்.... தற்போது வீட்டிலும் வைத்திருக்கிறேன்....

இது எனக்கு பல சங்கடங்களையும்.... எதிர் விவாதங்களையும்... வருத்தத்தையும் ஏற்படுத்தினாலும் பணம் வாங்க மறுத்து விட்டோம்

அன்புடன்... நாங்கள்.

க. சிவரஞ்சினி.

சி. கருணாகரசு. (தற்காலிக தொடர்புக்கு..... 7502827721)

நாளைய உலகம்! (தாயகம் வருகிறேன் (செல்கிறேன்).........)

2010-09-02T18:10:00.004+08:00

நாம் வியந்துப் போற்றும்

அதி நவீனங்கள் அத்தனையும்

பழமையென

பயனற்றுப் போகும் !

நம்,

கற்பனைக்கு சிக்காத

பிரமாண்டங்கள் எத்தனையோ

மலிந்து கிடக்கலாம் _இந்த

மனிதர்களுக்கு மத்தியில்.

இருந்தென்ன...

மனித உணவு

மாத்திரையாய் விற்கும்!

காற்றுக்கு விலைகொடுக்க

கடைகளில் வரிசை நிற்கும்!!.

வலைத்தளத்தின்,
படைப்பாளிகளே... படிப்பாளிகளே
உயிர் போகும் தருணத்திலும் என்னை உயிர்ப்புடன் வைத்திருந்தது வலைத்தளம்.

ஆகையால் உங்களிடம் சொல்லிக்கொண்டு தாயகம் செல்கிறேன் (வருகிறேன்)

மீண்டும் வலைப்பக்கம் வருவதற்கு 5 அல்லது 6 வாரங்கள் ஆகலாம். இன்னும் 2 வாரங்களுக்கு பின் தானியங்கி முறையில் என் இடுகை வெளியாகும் ... அதை சேர்க்க வேண்டிய இடத்தில் யாராவது சேர்த்துவிடுங்கள்.

இதுவரை உங்க ஆதரவு இனியும் தொடர வேண்டுகிறேன்.

அனைவருக்கும் நன்றி ... சென்று வருகிறேன் .

வானம் வசப்படும்?

2010-08-25T22:49:00.003+08:00

தொட்டுணர முடியாத

தொலைதூர மாயை

உச்சரிக்கப்படுகிறது

உண்மைக்கு மாறாக...

வானம் வசப்படுமென்று.

“வானம் வசப்படும்”

நடக்காத ஒன்று இது

நம்பிக்கைக்கு உதாரணம்!

உண்மைக்கு புறம்பாய் இது

உருவாக யார்க்காரணம்?

வானம் வசப்படும் என்பது

மோனைக்கென சொல்லப்பட்ட...

முரண்.

முன்னேற்றத்திற்கு தேவைத்

தனித்திறன்.

வசப்பட வாழ்வினில்

ஆயிரம் இருக்கு!

வசப்படா வானத்தை

வம்பிழுப்பது எதற்கு?

.

நேர்மைக்காக (உமா சங்கர்)

2010-08-18T22:00:00.002+08:00

நேர்மைக்கு தண்டனை...

வரலாறு சிரிக்கும்!

நேர்மைக்கு வந்தனை...

வரலாற்றில் நிலைக்கும்!!

இது...

ஆறறிவின் அளவுகோள்!

இன்று...

ஆள்வோருக்கான வேண்டுகோள்!!

வானொலியில் நான்.... (காதல்)

2010-08-15T08:43:00.000+08:00

வணக்கம் ,
சிங்கப்பூர் வானொலி ஒலி 96.8 ல்.... ”காதல்” படப்பாடலைப் பற்றிய எனது கண்ணோட்டம்.
இது “கவிஞர் நேரம்” நிகழ்ச்சிக்காக ஒலியேறிய படைப்பு. ( பாடலுடன் )

படம் :காதல்
பாடல் :உனக்கென இருப்பின் ... உயிரையும் கொடுப்பேன்
பாடலாசிரியர்: திரு நா. முத்துக்குமார்
படைப்பு :சி.கருணாகரசு.

கர்ப்பிணி

2010-07-28T19:00:00.004+08:00

உருவான நாள்முதல்

உருமாற்றம்
உனக்கும்...
உனக்குள்ளும் !

கணபொழுதையும்
கவனத்தால் நிரப்புகிறாய் !
கருவறை தேவைகளை
கவனித்து நிரப்புகிறாய் !!

ஆட்கொள்ளும்
அவ்வபோது ...
உடல் களைப்பு !
அது உனக்கு
அணுவெல்லாம்
உயிர் களிப்பு !!

உபாதைகள் உனக்குள்ளே
உயிரறுக்கும் !_ நீ
வயிர்த்தடவும் உவகையால்
அதுமறக்கும் !!

பெண்ணே _ இது
உனக்குள்ளே
உயிர் உலகம் ...
சுழலும் தருணம்!
உனைச்சுற்றி
ஓருலகம்...
மகிழும் தருணம் !!

என் இல்லத்தரசிக்கு......

மனம்

2010-07-22T20:08:00.006+08:00

உடலின் எதனுள் மறைந்து வசிக்கிறாய்
உன்னை அறியத் துடித்தேன் !
இடமா, வலமா இருப்பது எங்கே ?
என்றுநான் தேடிக் களைத்தேன்

இதயமா, மூளையா நீயெது என்றே
எனக்குள் குழம்பித் தவித்தேன் !
அதிசய முத்தாய் அகமெனும் சிப்பியில்
ஆனதைக் கண்டு பிடித்தேன்

மனிதனை ஆளும் மகத்துவ சக்தி
மனமே இதுவரை நீயே !
எனினும் சிலரில் மிருக வெறியை
ஏற்றி வைப்பதால் தீயே!!

எல்லா உயிரிலும் அன்பதைத் தூவி
எங்கும் அமைதி பரப்பு !
கல்லாய் இருக்கும் மனிதனைக் கொஞ்சம்
கடவுள் நிலைக்குத் திருப்பு !!

( இக்கவிதை 2003 மார்ச்சில் கவிமாலையில் பரிசு பெற்றது .... எனது "தேடலைச் சுவாசி " நூலிலும் இடம்பெற்றது ,
கவிதை சமநிலைச் சிந்து என்னும் மரபில் இயற்றப்பட்டது .... குறையிருப்பின் சுட்டவும் )

கவிஞர் நேரம் , விருமாண்டி, (வானொலியில் நான் )

2010-07-18T15:40:00.000+08:00

வணக்கம் ,
சிங்கப்பூர் வானொலி ஒலி 96.8 ல்.... விருமாண்டி படப்பாடலைப் பற்றிய எனது கண்ணோட்டம்.
இது “கவிஞர் நேரம்” நிகழ்ச்சிக்காக ஒலியேறிய படைப்பு. ( பாடலுடன் )

படம் :விருமாண்டி
பாடல் :உன்னைவிட இந்த உலகத்தில் ஒசந்தது ஒன்னுமில்ல
பாடலாசிரியர்: திரு கமலகாசன்
படைப்பு :சி.கருணாகரசு.

கவியரசருக்கு கவிதாஞ்சலி , (காணொளியில் நான்)

2010-07-09T19:48:00.011+08:00

நடிகர் திரு சிவக்குமார், எழுத்தாளர்க் கழகத் தலைவர் திரு நா.ஆண்டியப்பன் ...நான்.

சிங்கப்பூர் தமிழ் எழுத்தாளர்க் கழகம் 2008 ஆம் ஆண்டு நடத்திய "கவியரசு கண்ணதாசன் விழா"வில் ...." கவியரசருக்கு கவிதாஞ்சலி " நிகழ்வில் நான் பாடிய கவிதாஞ்சலியை காண "இங்கே"
சொடுக்கவும் .... (http://www.youtube.com/watch?v=YBR-4Ewf828)

சிட்டுக்குருவி

2010-06-25T17:05:00.002+08:00

எங்கும் நீ ,
தானியத்திலிருந்து ... விரட்டினேன் !

எங்கே நீ ?
தானியத்தோடு ... விரட்டுகிறேன் !!

(அழிந்து வரும் சிட்டுக்குருவி இனத்திற்கு காணிக்கை )

பாறை உடைக்கும் பனிப் பூக்கள்

2010-06-18T18:57:00.007+08:00

தங்கமே எனச் சொல்லி

தாலாட்ட எவருமில்லை
செல்லமே எனச் சொல்லி
சீராட்ட ஆளுமில்லை .

ஆசையாய் பொம்மைக்கேட்டு
அடம் பிடித்து அழவில்லை
பசி வந்து எனைவாட்ட
பால் கேட்டு அழுகின்றேன்

பச்சிளம் குழந்தை என்றா
பசி விலகி ஓடிவிடும் ?
வறுமைக்கு மரணமென்றால் _என்
வருத்தங்கள் ஓடிவிடும் .

விண்முட்டும் விஞ்ஞானம்
வீதியெல்லாம் நடத்துறாங்க
விதியோட போராடும் _என்மை
வேடிக்கை பாக்குறாங்க .

கல்வியை தரச்சொல்லி
கால்பிடித்து நிக்கலிங்க
கால் வயிற்றை ஈரமாக்கி _எம்
கண்ணீரை நிறுத்திடுங்க .

எனக்காக கல் உடைக்கும்
என்னோட பிறந்தவளே !
உனக்கு நான் உதவிட
உடல் வலிமை போதலியே .

கருவறைக்குள்ளேயே ... நான்
கரைந்து போயிருந்தால் ,
கஷ்டமும் உனக்கில்லை
கண்ணீரும் எனக்கில்லை .

பனிப் பூ கைப்பட்டு
பாறையது உடைகிறதே _ இதை
பார்க்கின்ற மனிதகுலம்
பாறைப்போல் கிடக்கிறதே !

( ஆறு ஆண்டுகளுக்கு முன்... சிங்கப்பூர் கவிச்சோலையில் இந்த படத்திற்கு கவிதை போட்டி நடைப்பெற்றது .... அப்போது நான் எழுதிய கவிதை இது .... பரிசு பெற வில்லை )

பொதி ஏற்றிகள்!

2010-06-11T18:58:00.005+08:00

கணினி வகுப்பு
நீச்சல் பயிற்சி
பாட்டு வகுப்பு
நடன பயிற்சி
துணைப்பாட வகுப்பு
வீட்டு பாடம்...என
சுழற்சி முறையில்
கசக்கி பிழிந்து,
பாரமேற்றி
பாடசாலைக்கு அனுப்பும்...

பொதியேற்றிகளே!

குழந்தைகளை...
படிக்க வையுங்கள்
"படுத்தி" வைக்காதீர்கள்.

கதவு

2010-05-31T09:10:00.007+08:00

யதார்த்தச் சுழலின்
புரிதலற்ற கோட்பாடுகளும் ,

நிகழும் இந்த நிமிடத்தின்
நிறைகாணா பார்வைகளும் ,

உறவுக்கெதிராய்...
கதவடைத்து விடுகிறது .

வேகமாக ...
சாத்தப்படும் கதவின் இடுக்கில்
பிஞ்சு விரல்கள் ....!
அதுதான் ,
பிசைகிறது மனதை .

(மறைந்த என் அண்ணன் திரு சி.திருவேங்கடம் அவர்களின் மகன் தி.தமிழ் உண்மை சிந்து ... அரசு பொது தேர்வில் 448 மதிப்பெண்கள் பெற்று தேர்வு பெற்றுள்ளான் )

மகன் தமிழுக்கு...
உன்னிடம் வாழ்த்தையும் மகிழ்ச்சியையும் பகிர்ந்துக் கொள்ள இயலாத உறவுநிலையில் என் (எங்கள் ) பரிதவிப்பின் வெளிபாடு இது.

உன்னிடம் சொல்ல முடியவில்லை !
உலகறிய சொல்கிறேன் வாழ்த்துக்கள் மகனே !!
(இதை யார் தடுக்க முடியும் )

உலக நண்பர்களே நீங்களும் வாழ்த்துங்கள் எங்கள் செல்வத்தை !!

உறவுகள்

2010-05-26T09:16:00.003+08:00

உறவு...
ஓர் அழகிய ... கவிதை .

கவிதையின் அழகில்
நிறையப் பொய்கள் !

(எனது தேடலைச் சுவாசி நூலிலிருந்து )

துயரம் வயது -1

2010-05-17T17:19:00.006+08:00

துரோகம்...
உயிர்களை அறுவடைச்செய்து
ஓராண்டாகிறது .

உறவுயிர்களின் இரத்தம் ...
மண்ணில் உறைந்துவிட்டது
மனதில்தான் பிசுபிசுக்கிறது !.

முதல் குழந்தை !

2010-05-12T18:56:00.005+08:00

யாருக்கும் தெரியாமலே

ஒளித்து வைத்திருந்தேன்

பதின்ம வயதிலேயே

துளிர்விட்ட ... "அந்த "

என் காதலை .

அடங்காத என் ஆசையால்

அந்த பருவத்திலேயே

நிறைய கருக்கலைப்புகளும்

நிறைய கருச்சிதைவுகளும்

நிகழ்ந்தப்படியே இருந்தன .

அதற்கான
அச்சத்தையோ
அவமானத்தையோ
உணரவில்லை நான் !
@

ஆயிரம் முயற்ச்சிக்கு பின்
அதே பதின்ம வயதில்
பெற்றெடுத்து விட்டேன் ...
"கவிதை"யாகிய
என்
முதல் குழந்தையை .
@

( கவிமாலை போட்டிக்கு எழுதிய கவிதை ... ஜனவரி 2010 )

அன்னையர் தினம் ?!

2010-05-07T22:17:00.007+08:00

அனுதினமும்
போற்றவேண்டிய
அன்னைக்கு ...
ஒரு தினம் ஒதுக்கிய
உத்தமர்களே !

நீங்கள் ....
அனுசரிக்க வேண்டாம்
அன்னையர் தினத்தை !
மூடினால் போதும்
முதியோர் இல்லங்களை .

(எனது தேடலைச்சுவாசி நூலிலிருந்து )

மே தினம்

2010-04-30T22:44:00.003+08:00

கொண்டாடப்பட்டது ...
வியர்வைக்கான
அங்கீகாரமாய் .

கொண்டாடப்படுகிறது ...
விடுமுறைக்கான
அலங்காரமாய் !

மே தினம் !

(சிங்கை) பதிவர்களுக்கு அழைப்பு

2010-04-23T09:28:00.003+08:00

இனிய சிங்கை பதிவர்களே .....

தமிழ் மொழி மாத நிறைவு நிகழ்ச்சியாகிய பொங்கு தமிழ் விழாவில் ......நானும் எனது நண்பர்களும் படைக்கும் கவிதை பட்டிமன்றத்துக்கு அன்புடன் அழைக்கின்றேன்.

நாள் : 25.04.2010.......ஞாயிறு

நேரம் : மாலை 6:30 க்கு சரியாக

இடம் : உமறு புலவர் தமிழ் மொழி நிலையம் (இரண்டாம் தளம் )

508, விக்டோரியா தெரு (லாவண்டர் எம்.ஆர்.டி அருகில் )

அனைவரும் வருக

தாயே திரும்பி போ!

2010-04-19T07:37:00.004+08:00

தாயே திரும்பிப் போ !

இது ,
பாதகர்கள் உலவும்
பாவ மண் ...._ இதில் உன்
பாதம் வேண்டாம் !.

தாயே திரும்பிப் போ !!

தமிழீழ தேசியத் தலைவர் மேதகு வே.பிரபாகரன் அவர்களது தாயார் திருமதி பார்வதியம்மாள் வேலுப்பிள்ளை அவர்கள் மருத்துவ சிகிச்சை பெறுவதற்காக வானூர்தி மூலம், நேற்று(16.04.2010) இரவு மலேசியாவிலிருந்து, தமிழகம் வந்திருந்தார். அவரை தரையிறங்க விடாமல், அதே விமானத்தில் இந்திய அரசு திருப்பி அனுப்பியமை மிகவும் கண்டனத்திற்குரிய மனிதத் தன்மையற்ற செயலாகும்

நட்பு

2010-03-06T21:46:00.004+08:00

நானும் அவனும்
நகமும் சதையும்
நான் நகம்
அவன் சதை .
வெட்டிவிட்டான் ...
நான் வளர்வதால் !

குறிப்பு ....
(படத்திற்கும் கவிதைக்கும் எந்த உள்நோக்கமும் இல்லை )
(கவிதை வாரமலரிலும் .... பின் எனது "தேடலைச் சுவாசி" நூலிலும்...இடம் பெற்றக் கவிதை )

நாகரிகம்

2010-03-03T17:47:00.000+08:00

துணிக்கடை பொம்மை

சேலையில் !

தொடைத்தெரிய உடுத்தியவள்

சாலையில் !

வெட்கப்பட்டது பொம்மை _இது

நாகரிக உலகின் உண்மை .

(இது ஒரு மீள் பதிவுங்க )

முன்னேற்றம்?!

2010-02-28T13:54:00.004+08:00

மாற்றங்கள் எல்லாம்
முன்னேற்றங்கள் ... அல்ல .

முன்னங்கால்கள் ...
கைகளாகி ,
முதுகு நிமிர்ந்த
மனித வடிவத்தை
முன்னேற்றம் என்பதில்
முழு உடன்பாடில்லை !.

அவன் ,
அக்கினியைக் கக்கும்
ஆயுதம் தூக்கி
பூமிப் பந்தை
காயப்படுத்த ...
முனையும் செயலை எப்படி
முன்னேற்றம் என்பேன் ?

எல்லைகள் தோறும்
வெள்ளைக் கொடி...
இதழ்களெல்லாம்
புன்சிரிப்பு .

மாறும் உலகில்
இவையிரண்டும்
மாறாதிருத்தலே...
முன்னேற்றம் !

(07- 08- 2004 இல் கவிச்சோலையில் பரிசு வென்ற கவிதை )

செல்லமே...!

2010-02-19T16:40:00.005+08:00

செல்லமே...!

எனக்கும் உனக்கும்

உடன்பாடு ஏதுமின்றியே ...

உற்ற துணையானோம் .

*
*

உனக்கு என் மீதும்

எனக்கு உன் மீதும்

ஏற்பட்ட பிடிப்பிற்கு

அன்பே ஆதாரம்.

என் முகம் காண

நீ மகிழ்வாய்

என் அரவணைப்பில்

நீ நெகிழ்வாய் ,

உன்னை ...

வாரியணைத்து

வாஞ்சையோடு கொஞ்சுவது

வழக்கம் எனக்கு .

எனக்காக காத்திருப்பதும்

என்னையே சுற்றிவருவதும்

உன் வாடிக்கை ,

உன் அருகாமையையும்

உன் தொடுதலையும்

விரும்புவது ... என் வாடிக்கை .

காலச் சூழல்

கடல் கடந்து வந்துவிட்டேன் ...

உன் பிரிவுத் துயரோடு .

என் பிரிவும்

உன்னை வாட்டலாம் .

... இருந்தும் கேட்கிறேன்

மனதளவில் இல்லாவிட்டாலும்

உடலளவிலாவது ...

நலமா ?

நன்றியுணர்வுள்ள ... என்

நாலுகால் செல்லமே ...!

(நான்கு ஆண்டுகள் முன்... என்மீது அன்போடு இருந்த நாய்க்குட்டியை பிரிந்து வெளிநாடு வந்த போது எழுதிய கவிதை .

இன்று அந்த குட்டி இல்லை ... ஆகையால் இந்த கவிதை என் நாய்க்குட்டிக்கு .... காணிக்கை . உண்மை படம் கிடைக்கவில்லை )

தாரத்தின்... தாய்மை !

2010-02-10T10:09:00.006+08:00

தாயகம் திரும்பும் ...

உன்னை

கணவனாக வழியனுப்புகிறேன் .

நீ ...

விமானம் ஏறும் அந்த

கடைசி நிமிடத்தில்

கையசைக்கும் போது

முந்தானையை பிடித்தோடும்

குழந்தையாய் ...

எனக்குள் பீறிடுகிறது

தாய்மையின் ஏக்கம் !

நீ ...

2010-01-31T21:47:00.000+08:00

நிலவுக்கு...நீ

நிகரானவள் அல்ல !

நிலா ...

பார்க்கத்தான் ...

நெஞ்சையள்ளும்!

பக்கம்சென்றால் ...

மேடுப்பள்ளம் !!

எனவே...

நிலவுக்கு ...நீ

நிகரானவள் அல்ல!!!

(மீள் பதிவு )

கவிதாஞ்சலி (முத்துக்குமார்)

2010-01-26T18:43:00.000+08:00

உலகத் தமிழினத்தின்

உறவாகிப்போன _ இன

உணர்வாளனே !

ஒற்றைத் தீக்குச்சியினால்

உலகின் மௌனத்தை எரித்த

மாவீரனே !

உனக்குள் எரிந்த

உணர்வலைகளை

உலகிற்கும் உணர்த்த

உயிர் ஈகம் செய்தவனே !

வல்லுறுகள் கொத்தித் தின்னும்

நம் ,

உறவின் துயரை ...

பார்க்க இயலாது

திணித்துக் கொண்டாயா

தீக்குள் உயிரை ?

நாங்கள் ,

வாழ்ந்து இறப்பவர்கள் .

நீ ,

இறந்தும் வாழ்பவன் !

இந்த இனமும்

இந்த மொழியும்

இருக்கும் வரை ...

நீ ,

கம்பீரத்தின்

அடையாளமாவாய் .

முத்துக் குமரா ,

அந்த தீவின்

அநீதிகளை...

எரிந்து எதிர்த்த உனக்கு ...

இந்த தீவின்

உன் ,

உறவான எங்களின்

வீர வணக்கமும்

அக அஞ்சலியும்

காணிக்கையாக

இந்த

கவிதையின் வாயிலாக _உன்

காலடிக்கு .

(முத்துக்குமார் அஞ்சலி நிகழ்வுகளில் கலத்துகொண்ட காட்சியும்

கடற்கரையில் மலரஞ்சலி நிகழ்வில் நான் வாசித்த கவிதையும் )

(..... இது ஒரு மீள் பதிவுங்க )

வட்டிக் கடன்

2010-01-15T19:17:00.005+08:00

தற்காலிகத் தீர்வென வந்து
தன்மானத்தை சிதைக்கும் !
எக்காலும் அவன் வாழ்வை
ஏறவிடாமல் வதைக்கும் !!

வளருமந்த வட்டிமட்டும்
வானளவு தழைக்கும் !_அதில்
வாங்கியவன் தினம்வாட
வாழ்க்கை எங்கே பிழைக்கும் ?

வட்டி ...
உணர்வை கொன்றுவிடும் !
சிலநேரம் ...
உயிரை கூட தின்றுவிடும் !!

இது ,
நிம்மதிக்கு பகை !
என்றும் ...
நெருடுகின்ற வகை !!

மனிதா ...
வட்டிகடன் வாங்காமல்
வாழ்க்கை நடத்த கற்கணும் !
இல்லையேல் ...
வாழ்வாதாரம் இழந்துபோய்
வாழ்வில் விளிம்பில் நிற்கணும் !!

உழவர்

2010-01-13T16:24:00.006+08:00

கலப்பை சுமந்து

உலகின் ...

களைப்பை போக்கும்

கழனிக் கடவுள் .

மரம்

2010-01-09T11:00:00.005+08:00

மரம் ஒரு
பச்சையக் கடவுள்...
மாசுகளிலிருந்து
மனிதரை காப்பதால் .
மரம் ஒரு
நிச்சயக் கடவுள் ...
காணிக்கையே இன்றி
காக்கின்ற அருளால் .

மரம் ...
கடும் நச்சு காற்றை
வடிக்கட்டும் தாவரம்.
மனிதா ...
மரம் வளர்த்து
நாளைய தலைமுறை
வாழ ... "தா"வரம் .

மண்ணுக்கும்
மரம்தான் உரம் !
மழைக்கும்
மரம்தான் வரம் !!

மனிதா ...
கோடாரியை தூர எறி!
மரம் காக்கும் ... புது
கொள்கைத் தரி !!

வழிப்பறி

2009-12-24T19:47:00.005+08:00

பட்டப் பகலில்
விழியை ஆயுதமாக்கி
என் இதயத்தை
பறித்துச் சென்றாள்.

அவளின் ...
அடையாளங்கள் ,

செந்நிற மேனி
சிவந்த உதடு
மஞ்சள் தாவணி
மயக்கும் விழிகள்
கால் சலங்கையோ ...
கவிதையின் சந்தம் !

தகவல்
தரவேண்டிய முகவரி ...

இதயத்தை இழந்தவன் ,
கவிதை இல்லம் ,
காதல் தெரு ,
அஞ்சல் எண் 237.

( எனது தேடலைச்சுவாசி நூலிலிருந்து )

காமுக (ஆ)சாமி!!!

2009-12-22T07:41:00.004+08:00

கடவுள் வாழும்
கருவறையில் ...
கற்பூரத்தைக்
கொளுத்தும் ... பூசாரி
கற்பை கொளுத்தியதாய்
காணோளிச் செய்தி !!!

இப்போதுதான்
இடம் மாறுகிறது
என் கோபம்
பூசாரி மீதிருந்து ...
கடவுளுக்கு !

( கவிமலையின் இம்மாத "இடம் விட்டு இடம் " தலைப்புக்கான போட்டிக்கு அனுப்பப்பட்ட கவிதை )

பூ

2009-12-18T22:28:00.006+08:00

தேன் கிண்ணம்!.

(எனது தேடலைச்சுவாசி நூலிலிருந்து )

வரதட்சணை

2009-12-13T08:27:00.006+08:00

பெண் வீட்டாரிடம்

பிடிவாதாமாக வாங்கப்படும்

அதிகாரப் பிச்சை .

மங்கை ஒருத்தி மூலம்
மகனையே விலைப்பேசும்
மானங்கெட்ட வித்தை !

(எனது தேடலைச்சுவாசி நூலிலிருந்து )

கண்ணாடி

2009-12-08T22:23:00.004+08:00

மிக அழகிய
கண்ணாடிச் சுவர்கள் ...
முள்வேலியை விடவும்
மூர்க்கமாய் !!!

தரையிறங்கிய விமானத்திலிருந்து
வெளியாகும் உறவுக்காக
காத்திருக்கும் ... தருணங்களில் .

(அண்மையில் விமான நிலையத்தில் இல்லத்தரசிக்காக காத்திருந்தபோது )

காணாமல் போகும் முன் ...!

2009-11-25T20:11:00.002+08:00

என் நேசத்துக்குரிய "உனக்கு"
உன் மீது எனக்கிருந்த ...
பழைய காதலின்
நினைவுச் சுவட்டோடு...
எழுதுகிறேன்.

உன்னை கையாள்வது
ஒரு கலை!.

தகவல்கள் எப்படியாயினும்
ஓர் பிணைப்போடுதான்
ஆரம்பிக்கப்படுவாய்.

உலகம் முழுதும்
வியாப்பித்திருந்த உன்னை
ஓர் மூலையில் ஒதுக்கியதில்
நானும் ஒருவன்!.

என் விடுதிக்காலத்தில்
என் தேவைகளுக்கான
தூதுவன் நீதான்!.

நட்பு
காதல்
உறவு என
அத்தனைக்கும்
பாலமும்... பலமும்
நீயே தான்!.

உன்னை பாவிக்கும் போது
சிந்திக்கும்...
அவகாசம் இருந்ததால்
நீ,
நிதானத்தின் அடையாளமானாய்!.

முன்பொரு காலத்தில்
உன்னை
புறாவின் காலில்
கட்டி அனுப்பினார்கள்
பின்...
முத்திரை குத்தி அனுப்பினார்கள்.

இன்றோ
மனித முகவரிகள்
எழுத்துகளிலிருந்து
எண்களாகிவிட்டதால்
உன் அழகு
பராமரிக்கப்படவில்லை.

அதனால்தான்...
நீ
காணாமல் போகும் முன்
“கடிதமே”!
உனக்கோர் கடிதம்
எழுதுகின்றேன்.

(முன்பு இணைய இதழில் வெளியான என் கவிதை )

காதல் பேசிகள்

2009-11-20T11:37:00.006+08:00

உலகப் பந்தின்
இருவேறு திசைகளிலிருந்து
நீயும் நானும்
காதல் பேசிகளானோம்.
*
கடிகார நிமிடமுள்
சில வட்டமடிக்க ,
அலைப்பேசி மின்கலன்
சக்தி இழக்க,
ஏதேதோ ...
பேசி களித்தோம் ,
ஏதேதோ ...
பேசி களைத்தோம் .
*
இறுதியாய் ,
எதைப் பேச மறந்தோம் ...
எதைப் பேசி மறந்தோம் ...
இருவருக்கும் தெரியவில்லை! .
*
இருந்தும்
தொடர்பைத் துண்டித்து ,
தயாராகிறோம் ...
நாளைய ...
அலைபேசி அழைப்புக்காக .

( திருமணத்திற்கு முன்பு ... இல்லற தோழிக்கு பேசியபோது )
(இது ஓர் மீள் பதிவுங்க ..... யாரும் என்வலைக்கு வராத காலத்தில் எழுதப்பட்டது . அதாவது ... பின்னூட்டமே இல்லாத கவிதைங்க )

ஏனெனில் நான் கவிஞன்

2009-11-17T16:07:00.011+08:00

உங்கள் மனத்தராசு ...
பொருளாதாரத்தையே
எடைபோடுகிறது .
என் தராசுத் தட்டுகளில்...
ஈரமும் அன்பும் தான்
எடைக்கற்கள் .

உடுத்திய உடைகளிலேயே
உட்கார்ந்து விடுகிறது
உங்கள் விழிகள் .
திரையிடாத என்
மனதைப் பார்க்காமல் !

தடாகம் சேறானதும்
மீன் பிடிக்கின்றீர்கள் !
நானோ ...
தாமரையை இரசிக்கிறேன் .

"அவளை" நிலவென்றேன்
பொய் பேசுகிறேன் என்கிற
நீங்களேதான்
நிலவை ஓடிவரச் சொல்லி
சோறு ஊட்டுகிறீர்கள் .

அந்த ...
ரோசா செடியின்
முட்களைச் சபிக்கின்றீர் ...
நீங்கள் .
அங்கே ...
மலர்களை இரசிக்கிறேன் ...
நான் .

துக்கத்தில்
கண்ணீர் பிறக்கிறது
உங்களுக்கு .
கவிதை பிறக்கிறது
எனக்கு .
ஏனெனில் ...
நான் ... கவிஞன் .

01-12-2002- ல் மலேசியா தமிழ்நேசனில் வெளியானது ... பின் 2004 - ல் எனது தேடலைச்சுவாசி நூலிலும் இடம் பிடித்த கவிதை ... இன்று வலைத்தளத்திலும் ....
(நிழற்படம் ... கவிமாலை விருது விழாவில் கவிதை வாசிக்கும் பொது 2009 )

தேடலைச்சுவாசி

2009-11-07T16:45:00.005+08:00

தேடல்
உன்
முகாரிக்கு முடிவுரையும்
பூபாளத்திற்கு வாழ்த்துரையும்
எழுதுமோர் ...
சிறகுச் சித்தாந்தம் .

இது
சுயமேம்பாட்டின்
சுருக்கெழுத்து .
வானத்தையே விலைபேசும்
வசீகர மந்திரம் .

தேடலே ...
நித்தம் உன்னை
புதிதாய்ச் செதுக்கும்
வைர உளி .
இருட்டிலும் உன்னை
ஒளிரச் செய்யும்
சூரிய வெளிச்சம் .

தேடல்
உன்
முன்னேற்றத்தை
முகவரியாய் எழுதும்.
முகத்தைப்
பொன்னேட்டில் வரையும் .

தேடல்
விடியலைக் கற்பிக்கும்
வியர்வைப் பாடம் .
வெற்றிக் கனி பறிக்க
வித்திடும் ஏணி .

தேடலினால்
சிகரங்கள்
உன்னிடம்
கைகுலுக்கும் .
தேசங்கள்
உன்னை மொழிபெயர்க்கும் .

தேடல்
வாழ்வின் பிடிப்பு
வசந்தத்தின் அழைப்பு
இது ,
என்றும் உன்னை
இளமையாய் வைத்திருக்கும்
சுவை மருந்து - இதை
தினம் அருந்து.

தேடலை என்றும் சுவாசி !
தேசத்தில் நீதான் சுகவாசி !!

(இது எனது முதல் இலட்சிய படைப்பான "தேடலைச்சுவாசி" நூலிலிருந்து.... )
( வெளியிட்ட‌ ஆண்டு.2004 சூலை )

முள்வேலி (கிழிந்த வாழ்வு )

2009-11-01T16:09:00.005+08:00

எங்கள் ...
கிழிந்த வாழ்வின்
உடுப்புகளும் ...
உரிமைகள் போலவே !

உலர்கின்றன ... முள்வேலியில் !!

வாஸ்து

2009-10-28T19:43:00.003+08:00

இது ,
காற்றுவரும்...
வாசல் அதை பூட்டிவிடும் !

உன்
கழிவறையில் ...
உணவு மேசை போட்டுவிடும் !!

புகைத்தல் , (வெண்சுருட்டு)

2009-10-22T00:36:00.004+08:00

விரலிடுக்கில் ...
அது கசியும்போது
காலத்தின் இடுக்கில்
நீ ...
நழுவிக்கொண்டிருக்கிறாய் !

அந்த நாற்றம்
உன்னை ...
நெருங்கும் தூரத்தை
அதிகரிக்கிறது !

அது,
கரைத்துக்கொண்டே இருக்கிறது
உன் ...
காலத்தையும்
காசையும் !

உன் ,
அழகு
ஆற்றல்
இரண்டிற்குமே
எமனகிறது அது !

அது ... நோய்களை
உனக்குள்ளும் நிரப்பும்
உன் வாரிசுக்கும் பரப்பும் !

புத்துணர்ச்சி என்று
புகைத்தால் ...
புற்று உணர்ச்சியாய் வந்து
புதைக்கும் !

ஆயிரம் கேடுகள்
அதற்குள் இருக்கு
அந்த அரக்கன்
அவசியமா உனக்கு ?

புகைத்தலை நிறுத்த ...
1. நிறுத்த முடியும் என்ற நம்பிக்கையும் நிறுத்த வேண்டும் என்ற ஆசையும் இருந்தால் போதும் .
2. குறிப்பிட்ட நாள் , நேரம் வகுக்காமல் ... உடனடியாக செயல் படுத்துவது .
3. புகைக்கு மாற்றாக எதையும் எண்ணாதிருத்தல் ... நாடாதிருத்தல் .
4. அரைநாள் ... ஒருநாள் ...இரண்டுநாள் என புகைத்தலிலிருந்து விடுபட்ட உணர்வை நிறைவாக உணர்தல் . அந்த நாள் எண்ணிக்கையை
உயர்த்துதல் .
5. மருந்துக் கடையில் "நிக்கோட்டின் ஒட்டு வில்லை " உள்ளது. அதை உடலில் ஒட்டிக்கொண்டால் ... அது புகைக்கும் உணர்வை எற்படுத்தாது உதவும் . புகைப்பவர்கள் முயற்சி செய்யுங்கள் ... முடியும் உங்களால் !!!

பின் குறிப்பு :
10 ஆண்டுகளுக்கு முன் புகைக்க பழகி ... ஒரே நாளில் 20 முதல் 25 வரை புகைத்த நான் கடந்த 2007 இல் (13-11-2007) புகைப்பதை கைவிட்டு ... எதோ சாதித்த உணர்வோடு மகிழ்வுடன் இருக்கிறேன் . (வலியுறுத்திய இல்லறத் தோழிக்கு நன்றி )

பிரிவு

2009-10-18T15:49:00.004+08:00

பிரிவு......

நட்பில்லாதவனுக்கு ...
உடல் அசைவு .

நட்புடையவனுக்கு ...
உயிர்க் கசிவு .

( எனது தேடலைச் சுவாசி நூலிலிருந்து )

உலக வெப்பம்

2009-10-13T18:51:00.005+08:00

நாம் விழித்துக் "கொள்ளும்"

தருணம் இது !

இல்லையேல் ...

ஆர்ட்டிக் விழித்துக் "கொல்லும்"

தருணம் இது !!